amiir se hai ta.alluq na ye gharib se hai
sukun-e-qalb mayassar magar nasib se hai
hamare saath yahi rabta ḳhulus se tha
hamare dost ka jo aj-kal raqib se hai
ye umr bhar ke raqibon se bad-zani meri
mushahide ki bina par hai jo qarib se hai
ye zindagi to ho malum alf-laila ka
ik iqtibas kisi qissa-e-ajib se hai
sitam zamane ka fil-vaqt zer-e-bahs nahin
hamara ru-e-suḳhan ‘shaukat’ ik habib se hai
Leave a Reply