Faza Ibn E Faizi
muddaton ke baad phir kunj-e-hira raushan hua
kis ke lab par dekhna harf-e-dua raushan hua
ruuh ko ala.ish-e-gham se kabhi ḳhali na rakh
yaani be-zangar kis ka aa.ina raushan hua
ye tamasha didani Thahra magar dekhega kaun
ho ga.e ham raakh to dast-e-dua raushan hua
raat jangal ka safar sab ham-safar bichhḌe hue
de na ham ko ye basharat rasta raushan hua
ḳhvahishon ḳhvabon ka paikar hi sahi mera vajud
ik sitare ki haqiqat kya bujha raushan hua
bu-e-gul patton men chhupti phir rahi thi der se
na-gahan shaḳhon men ik dast-e-saba raushan hua
is qadar mazbut mausam par rahi kis ki giraft
main ki mujh se sina-e-ab-o-hava raushan hua
ik zara us se baḌhi qurbat to ankhen khul ga.iin
us ke mere biich tha jo fasla raushan hua
vaqt ne kis aag men itna jalaya hai mujhe
jis qadar raushan tha main us se siva raushan hua
mujh ko meri agahi ankhon se ojhal kar ga.i
us ne jo kuchh lauh-e-jan par likh diya raushan hua
ai ‘faza’ itni kushada kab thi ma.ani ki jihat
mere lafzon se ufuq ik dusra raushan hua
Leave a Reply