Qamar Iqbal
ḳhud ki ḳhatir na zamane ke liye zinda huun
qarz miTTi ka chukane ke liye zinda huun
kis ko fursat jo miri baat sune zaḳhm gine
ḳhaak huun ḳhaak uḌane ke liye zinda huun
log jiine ke gharaz-mand bahut hain lekin
main masiha ko bachane ke liye zinda huun
ruuh avara na bhaTke ye kisi ki ḳhatir
saare rishton ko bhulane ke liye zinda huun
ḳhvab TuuTe hue ruThe hue lamhe vo ‘qamar’
bojh kitne hi uThane ke liye zinda huun
Leave a Reply