Waqar Manvi
ham tum ki roz-o-shab mile sham-o-sahar mile
lekin na dil na zaviya-ha-e-nazar mile
chhalni hain paanv kanTon-bhari rahguzar mile
ham ko hamari shaan ke shayan safar mile
main bhi kuchh apne karb ka iz.har kar sakun
mujh ko bhi kuchh saliqa-e-arz-e-hunar mile
be-mange paa.en buund bhi pyase to ji uThen
dariya bhi le ke ḳhush na hon mange se gar mile
ham bijliyon ki zad men musalsal rahen to kyuun
ye kya ki bijliyon ko hamara hi ghar mile
gulshan shaguftagi se ibarat na ho saka
ghunche khile khile se to har shaḳh par mile
paiman to ye tha mil ke na bichhḌenge umr-bhar
bichhḌe to is tarah ki na phir umr-bhar mile
tasir ke baghair dua ka bhi kya maza
lutf-e-dua ye hai ki ki dua ko asar mile
khul kar tum un se bhi na mile jin se qurb tha
aur ham ki jis kisi se mile TuuT kar mile
Dar hai kahin natija riha.i ka ye na ho
zindan ke ham rahen na hamen apna ghar mile
kis dil se arzu-e-ḳhushi kijiye ki ab
his tak ḳhushi ki miT ga.i gham is qadar mile
ye zindagi vo tapta hua regzar hai
jis men kahin na saaya na shaḳh-e-shajar mile
vo hadse jo vaj.h-e-tabahi bane ‘vaqar’
un men se kuchh to ghar ki hi dahliz par mile
Leave a Reply