Saud Usmani
dil men rakkhe hue ankhon men basa.e hue shaḳhs
paas se dekh mujhe duur se aa.e hue shaḳhs
janta huun ye mulaqat zara der ki hai
tapti rahon men ḳhunuk chhanv khila.e hue shaḳhs
tere lab par tire ruḳhsar ki lau paḌti hai
tab-e-ḳhurshid se mahtab jala.e hue shaḳhs
ye to duniya bhi nahin hai ki kinara kar le
tu kahan ja.ega ai dil ke sata.e hue shaḳhs
dhuup ranjish ki tarah phail rahi hai mujh men
kya kahun tujh se mire saa.e men aa.e hue shaḳhs
munhadim hote hue vaqt se puchho to ‘sa.ud’
kya hue vo tire hathon ke bana.e hue shaḳhs
Leave a Reply