abhi rusva.iyon ka ik baḌa bazar aa.ega
phir is ke baad hi vo kucha-e-dildar aa.ega
vatan ki ek tasvir ḳhayali sab banate hain
ḳhabar lekin nahin kya is men ku-e-yar aa.ega
gul-e-shaḳh-e-mohabbat par lahu ka rang khilta hai
ki ab rang-e-hina zikr-e-lab-o-ruḳhsar aa.ega
hamare vaste bhi sa.at-e-hamvar Thahregi
ki rah-e-shauq men jis dam vo na-hamvar aa.ega
abhi ab-o-hava-e-jism ke asrar khulte hain
abhi vo toḌne is jism ki divar aa.ega
karo ahl-e-junun kuchh to karo saman-e-dildari
ki shahr-e-ishq men vo shoḳh pahli baar aa.ega
Leave a Reply