ḳhud men utren to palaT kar vapas aa sakte nahin
varna kya ham apni gahra.i ko pa sakte nahin
ḳhushbuen kapḌon men nadida chaman-zaron ki hain
ham kahan se ho ke aa.e hain bata sakte nahin
ham ne in galiyon men chalne ki ri.ayat li hai bas
dekh sakte hain hamen ye ghar basa sakte nahin
ye bharam manzar ka bhi hai aur pas-manzar ka bhi
aḳhiri naqsh-e-tamasha hai miTa sakte nahin
naqsha-e-na-bud uTha.e phir rahe hain shahr shahr
phir rahe hain aur bas aage bata sakte nahin
ham koi parda mukammal kar rahe hain der se
aankh chahen bhi to tujh par se haTa sakte nahin
zindagi ham teri janib aa rahe hain ek saath
ek saath aane ka matlab hai ki aa sakte nahin
saari girhen khol kar bekar ho baiThe to hain
ab lagate hain dobara aur laga sakte nahin
intizari hain so bam-o-dar pe bhari bhi to hain
raḳhne bhar sakte nahin parde gira sakte nahin
alvida’i ik charaghan aur phir ruḳhsat hamen
ab mazid is raushni par daad pa sakte nahin
rahte rahte rah na jaa.en log is tasvir ke
ham-qadam us ke hain jis ke saath ja sakte nahin
haath se nikle hue na-vasf na-vaqton ke ham
haath aana chahte hain aur aa sakte nahin
teri janib se uTha sakte hain gar paanv to kya
teri janib se ham apni ḳhaak uḌa sakte nahin
Leave a Reply