Ghani Ejaz
junun men der se ḳhud ko pukarta huun main
jo gham hai daman-e-sahra men vo sada huun main
badal gaya hai zamana badal gaya huun main
ab apni samt bhi hairat se dekhta huun main
hayat ek saza hai bhagat raha huun main
dar-e-qubul se lauTi hui dua huun main
jise ḳhud aap hi apne pe pyaar aa jaa.e
jafa ke daur men vo laghzish-e-vafa huun main
jamal-e-yar ki ra.ana.iyan ma.az-allah
nigah ban ke nazaron men kho gaya huun main
bas ek jumbish-e-lab tak vajud hai jis ka
zaban-e-shauq pe vo harf-e-mudda.a huun main
agar hai jurm mohabbat to phir takalluf kya
madar-e-jurm huun taqsir huun ḳhata huun main
rafaqaton ke ye fanus ta-ba-kai ‘ejaz’
hava ki zad pe larazta hua diya huun main
Leave a Reply