quran kitab hai rukh-e-janan ke samne
mushaf utha luun sahab-e-quran ke samne
jannat hai gard kucha-e-janan ke samne
dozakh hai sard sina-e-sozan ke samne
sakta abhi ho ruh-e-sikandar ko sharm se
aina aae gar tire hairan ke samne
bahr-e-ummid gar use phailaun su-e-yar
daman-e-dasht tang ho daman ke samne
dast-e-junun se vo bhi na vahshat men bach saka
parda jo kuchh raha tha gareban ke samne
mashshata ho aziz-e-zulekha agar vo laae
is mehr-e-misr ko mah-e-kanan ke samne
nadan kah rahe hain jise aftab-e-hashr
zarra hai us ke ru-e-darakhshan ke samne
dam band us latode ki jurat ne kar diya
karta hai rez bulbul-e-bustan ke samne
divar surkh khuun se dekhi pata mila
qasid thahar gaya dar-e-janan ke samne
kahte hain roz-e-vasl jise past-hausla
be-qadr hai miri shab-e-hijran ke samne
taqrir dil jalati hai sunne se ai ‘surur’
aata hai kaun mujh sharar-afshan ke samne
Leave a Reply