gaya hai jab se dikha jalva vo pari-rukhsar
na khvab dida-e-giryan men hai na dil ko qarar
hazar rang se phule chaman men go gulzar
par us baghair khush aati nahin mujhe ye bahar
ba-rang-e-lala-e-sar mai-kashi nahin tujh bin
ki khun-e-dil se main har roz todta huun khumar
gulon ke munh pe na ye rang-e-ab-o-tab rahe
vo rashk-e-bagh kare gar udhar ko aa ke guzar
ajab nahin ki baha deve khana-e-mardum
rahe gar ashk-fishan yunhi dida-e-khun-bar
rihai kyunki ho ya-rab main is men hairan huun
ki ek dil hai mira tis pe dard-o-gham hai hazar
kaha main us but-e-abru-kaman ki khidmat men
khadang-e-jabr ne tere kiya hai mujh ko nigar
na rahm tere dil-e-sakht men hai ghair-az-zulm
na mere nala-e-jan-soz men asar ai yaar
na taab hijr ki rakhta huun ne umid-e-visal
khuda hi jaane ki kya hoga us ka akhir-kar
har ek din mujhe yuun sujhta hai ji tan se
nikal hi jaega ham-rah-e-ah-e-atish-bar
na tu mazar pe avega ta-dam-e-mahshar
rahegi dida-e-giryan ko hasrat-e-didar
abas tu mujh ko darata hai apne marne se
hazar tujh se mire mar gae hain ashiq-e-zar
ye sun ke kahne laga vo sitamgar-e-be-rahm
miri bala se jo mar jaega tu ai ‘bedar’
Leave a Reply