mai-khana-e-hasti men aksar ham apna thikana bhuul gae
ya hosh men jaana bhuul gae ya hosh men aana bhuul gae
asbab to ban hi jaate hain taqdir ki zid ko kya kahiye
ik jaam to pahuncha tha ham tak ham jaam uthana bhuul gae
aae the bikhere zulfon ko ik roz hamare marqad par
do ashk to tapke ankhon se do phuul chadhana bhuul gae
chaha tha ki un ki ankhon se kuchh rang-e-baharan le liije
taqrib to achchhi thi lekin do aankh milana bhuul gae
maalum nahin aine men chupke se hansa tha kaun ‘adam’
ham jaam uthana bhuul gae vo saaz bajana bhuul gae