Hashim Azimabadi
jaam tha ḳhum tha subu tha majma-e-ahbab tha
shaiḳh ka in sab men chehra kis qadar shadab tha
main ne dekha raat meri god men mahtab tha
aap hi ta.abir us ki den ye kaisa ḳhvab tha
qais divana tira ai laili-e-mahmil-nashin
teri surat dekhne ko kis qadar betab tha
vo quli tha ya tha koi kaaTh ka ullu murid
piiTh par laade hue jo shaiḳh ka asbab tha
us ne ye achchha kiya jo aqd hi paḌhva liya
dil muridan ke liye jab surat-e-simab tha
kyuun na daḌhi apni karta jumbish-e-razor ki bhenT
ḳhanda-zan is shakl par jab halqa-e-ahbab tha
raat bhar main ne sanvari zulf-e-laila-e-ghazal
sher ki aamad thi ‘hashim’ ya koi sailab tha
Leave a Reply