Khusha Bedad Khun-E-Hasrat-E-Bedad Hota Hai

Jigar Moradabadi

khusha bedad khun-e-hasrat-e-bedad hota hai

sitam ijad karte ho karam ijad hota hai

ba-zahir kuchh nahin kahte magar irshad hota hai

ham us ke hain jo ham par har tarah barbad hota hai

mire nashad rahne par vo jab nashad hota hai

bataun kya jo mera alam-e-fariyad hota hai

yahi hai raz-e-azadi jahan tak yaad hota hai

ki nazren qaid hoti hain to dil azad hota hai

dil-e-ashiq bhi kya majmua-e-azdad hota hai

udhar abad hota hai idhar barbad hota hai

vo har ik vaqia jo surat-e-uftad hota hai

kabhi pahle bhi dekha tha kuchh aisa yaad hota hai

badi mushkil se paida ek vo adam-zad hota hai

jo khud azad jis ka har nafas azad hota hai

nigahen kya ki pahron dil bhi vaqif ho nahin sakta

zaban-e-husn se aisa bhi kuchh irshad hota hai

tumhin ho tana-zan mujh par tumhin insaf se kah do

koi apni khushi se khanaman-barbad hota hai

ye maana nang-e-pabandi se kya azad ko matlab

magar vo sharm-e-azadi se bhi azad hota hai

tasavvur men hai kuchh aisa tiri tasvir ka aalam

ki jaise ab lab-e-nazuk se kuchh irshad hota hai

koi had hi nahin shayad mohabbat ke fasane ki

sunata ja raha hai jis ko jitna yaad hota hai