Aaina Hun Ki Main Patthar Hun Ye Kab Puchhe Hai

aa.ina huun ki main patthar huun ye kab puchhe hai

ziist mujh se mere jiine ka sabab puchhe hai

munkashif hone lage jab se rumuz-o-asrar

kuchh saval ab dil-e-ma.asum ajab puchhe hai

maqsad-e-zist, koi ḳhvab ya ḳhvahish koii?

ham ne jab si liye lab apne vo tab puchhe hai

har koi apni tag-o-dau men hai masruf yahan

kaun ab kis ki udasi ka sabab puchhe hai

vahshat-e-dil men kami ho bhi to kyaa, hal-e-darun

aur baḌh jaati hai kuchh, ham se vo jab puchhe hai

jis ne barbad kiya ḳhana-e-dil rah rah kar

kya qayamat hai, vahi is ka sabab puchhe hai

koi bhi rishta nikalta nahin ham donon men

phir bhi kyuun ham se hamara vo nasab puchhe hai

saath guzre the kabhi arsa huaa, mujh se magar

aaj bhi tera pata rah-e-talab puchhe hai

ik nida jis ko samajhte hain zamir apna sabhi

qabl-e-laghzish hamen is shakl men rab puchhe hai

ab ye aalam hai ki ḳhud vahshat-e-dil bhi ‘ḳhalid’

ghar mire der se aane ka sabab puchhe hai