Koi Jadu Na Fasana Na Fusun Hai Yun Hai

koi jaadu na fasana na fusun hai yuun hai

ashiqi silsila-e-kar-e-junun hai yuun hai

tu nahin hai to tire hijr ki vahshat hi sahi

ki ye vahshat hi mire dil ka sukun hai yuun hai

kuchh nahin kahna bhi kah deta hai saara ahval

khamushi aina-e-hal-e-darun hai yuun hai

jab se dekha hai mohabbat ko adavat karte

tab se honton pe mire haan hai na huun hai yuun hai

ab tire saath mira ji nahin lagta sain

tu ne puchha tha nami aankh men kyuun hai yuun hai

aaj bhi kal ki tarah der se ghar aaega vo

phir bahane vahi dohraega yuun hai yuun hai

Leave a Comment