ashk par gudaz-dil hashiya chaḌhata hai
ik zara se qisse ko dastan banata hai
haan vo kafir-e-nemat kor-zauq hai yaaro
jo gham-e-mohabbat ko hadisa batata hai
jite-ji ka rishta hai ruh-o-jism ka rishta
dhuup ke ta.aqub men saaya maat khata hai
jab zaban-bandi ho nazren kaam karti hain
ik payam aata hai ik payam jaata hai
pattharon ke siine men aa.ine bhi hiire bhi
zulmaton ka ḳhaliq hi mehr-o-mah ugata hai
kyuun javar-e-manzil men sust-e-gam hain raahi
qurb ka yaqin shayad fasla baḌhata hai
ai ‘uruj’ ye duniya qadr-e-dard kya jaane
kyuun zamana-sazon ko hal-e-dil sunata hai
Leave a Reply