Ashk Par Gudaz-Dil Hashiya chaDhata Hai

ashk par gudāz-dil hāshiya chaḌhātā hai

ik zarā se qisse ko dāstāñ banātā hai

haañ vo kāfir-e-nemat kor-zauq hai yaaro

jo ġham-e-mohabbat ko hādisa batātā hai

jīte-jī kā rishta hai rūh-o-jism kā rishta

dhuup ke ta.āqub meñ saaya maat khātā hai

jab zabān-bandī ho nazreñ kaam kartī haiñ

ik payām aatā hai ik payām jaatā hai

pattharoñ ke siine meñ aa.ine bhī hiire bhī

zulmatoñ kā ḳhāliq hī mehr-o-mah ugātā hai

kyuuñ javār-e-manzil meñ sust-e-gām haiñ raahī

qurb kā yaqīñ shāyad fāsla baḌhātā hai

ai ‘urūj’ ye duniyā qadr-e-dard kyā jaane

kyuuñ zamāna-sāzoñ ko hāl-e-dil sunātā hai

Leave a Comment