misl-e-bahisht-e-ḳhush-numa kaun-o-makan men
insan mubtala hai ajiib imtihan men
bujhti nahin hai koshish-e-dariya ke bavajud
ye kaisi tishnagi hai mire jism o jaan men
vo dhuup men khaḌa hai baḌe itminan se
lau de raha hai mera badan sa.eban men
kyuun naam intisab men likhkha gaya mira
kirdar jab nahin tha mira dastan men
is baar pastiyan bhi mayassar na a.engi
shal ho ga.e jo bal-o-par unchi uḌaan men
vabasta tujh se azmat-e-sher-o-suḳhan hui
is baat ko bhi rakhna ‘ḳhayal’ apne dhyan men
Leave a Reply