Ghani Ejaz
thakan ghalib hai dam TuuTe hue hain
safar jaari qadam TuuTe hue hain
ba-zahir to hain salim jism-o-jan se
magar andar se ham TuuTe hue hain
adhure hain yahan saare ke saare
sabhi to besh-o-kam TuuTe hue hain
bura ho e’timad-e-bahami ka
ki sab qaul-o-qasam TuuTe hue hain
ta.alluq TuTne ko hai jahan se
chalo ki band-e-gham TuuTe hue hain
ḳhuda ka ghar na baḳhsha zalimon ne
ka.i dair-o-haram TuuTe hue hain
unhen munsif nahin qatil kaho tum
ki sab un ke qalam TuuTe hue hain
Leave a Reply