Har Chand Ki Pyara Tha Main Suraj Ki Nazar Ka

Siddique Afghani

har chand ki pyara tha main suraj ki nazar ka

phir bhi mujhe khaTka hi raha shab ke safar ka

uljhi hai bahut jism se dariya ki ravani

is chobi mahal ka koi taḳhta bhi na sar ka

Duuba hua aivan-e-shafaq bhi hai dhuen men

be-rang sa har naqsh hai divar-e-sahar ka

riste hue nasur pe chalte rahe nashtar

taaza hi raha phuul sada zaḳhm-e-hunar ka

main huun ki kaḌi dhuup ke sahra men ghira huun

saaya kahin milta hi nahin shaḳh-e-shajar ka

mazlum tha main kal bhi to mahrum huun ab bhi

unvan badalta hi nahin meri ḳhabar ka

bijli to suna hai kahin jangal men giri thi

utra hua chehra hai chaman men gul-e-tar ka

tab barf ke mahtab se phuTengi shua.en

bujh ja.ega jab sho.ala mire dagh-e-jigar ka

a.ina shikasta hua chubhne lagin palken

nazzara bhi dekha na gaya rup-nagar ka

aaseb ho sarsar ho bala ho ki qaza ho

sab ke liye darvaza khula hai mire ghar ka

uḌti hi rahi ḳhak-e-badan tez hava men

ehsan ye kuchh kam to nahin barq-o-sharar ka

miT ja.engi peshani-e-marmar se lakiren

ab rang utar ja.ega ta.us ke par ka

ḳhushiyon ka chamak-dar hiran haath na aaya

pichha kya aahon ne bahut jazb-o-asar ka

kis tarah mayassar ho mujhe arsa-e-rahat

har lahza na.i choT naya gham naya charka

‘siddiq’ jinhen rah-e-vafa main ne sujha.i

patthar vahi kahte hain mujhe rahguzar ka