Poet
baaqi na hujjat ik dam-e-isbat rah ga.i
sabit kiya jo us ka dahan baat rah ga.i
kya jald vasl-e-yar ki kam raat rah ga.i
jo baat chahte the vahi raat rah ga.i
bad-namiyon ke Dar se vo milte hain gaah gaah
chori-chhupe ki un se mulaqat rah ga.i
giryan vo huun jo abr-e-mizha ki jhaḌi lagi
munh mera dekh dekh ke barsat rah ga.i
har-vaqt baat baat pe dete ho jhiḌkiyan
kyuun sahab ab hamari ye auqat rah ga.i
milta nahin kisi se bashar koi be-gharaz
matlab ki ab jahan men mulaqat rah ga.i
gardish men saath un ankhon ka koi na de saka
din rah gaya kabhi to kabhi raat rah ga.i
vaa.iz ko apne rang pe le aaya khinch kar
aaj abru-e-rind-e-ḳharabat rah ga.i
baten suna.in ghairon ke aage jo yaar ne
farma.iye phir aap ki kya baat rah ga.i
furqat men sabr-o-hosh to sab kuuch kar ga.e
par ek jaan morid-e-afat rah ga.i
tauhin-e-mai na karti thi rindon men va.iza
izzat tumhari qibla-e-hajat rah ga.i
dil men to ḳhaak uḌti hai zahir men hain fida
ab to munafiqana mulaqat rah ga.i
dene ke badle dete hain saa.il ko jhiḌkiyan
ye rah ga.e amiir ye ḳhairat rah ga.i
dil pa.emal karne the raftar-e-naz ko
ye chaal tujh se o but-e-bad-zat rah ga.i
amada jaan lene pe meri thi vo magar
kya janen kyuun ubhar ke tiri gaat rah ga.i
duniya se baḌh ke kaun hai harja.i dusra
do din na kis ke paas ye bad-zat rah ga.i
jo kuchh tha paas kar chuke sab nazr mai-farosh
ab mai-kashon ki qarz pe auqat rah ga.i
karna tha naqd-e-hosh use nazr ai ‘qalaq’
pir-e-mughan ki ham se mudarat rah ga.i
Leave a Reply