safar ki akhiri manzil ke rahbar ham hain
hamare saath chalo gard-e-rahguzar ham hain
likhi hain chehron pe jo surkhiyan padho un ko
khabar ho aam ki duniya se ba-khabar ham hain
akela-pan hamen mahsus kab hua ab tak
ki dasht dasht hain lekin nagar nagar ham hain
ghanere saae na dhundo yahin pe dam lo zara
ki jis ki chhanv men thandak hai vo shajar ham hain
samundaron se kaho vo simat ke aa jaaen
ki is jahan men akele hi kuza-gar ham hain
vo khuub shakhs hai dekha hai mil ke ham ne use
magar hai ye bhi haqiqat ki khub-tar ham hain
Leave a Reply