Gopal Mittal
ik chheḌ thi jafaon ka teri gila na tha
tark-e-ta.alluqat mira mudda.a na tha
naseh vo shoḳh dushman-e-iman tha vaqa.i
aur phir mira mizaj bhi kuchh ashiqana tha
TuuTa hai apne zom-e-vafa ka tilism aaj
mahsus ho raha hai ki tu bevafa na tha
ham ḳhud bhi tark-e-rah-e-vafa par hain munfa.il
par kya karen ki aur koi rasta na tha
jab se juda hue hain tabi.at udaas hai
aur lutf ye ki tujh se koi mudda.a na tha
Leave a Reply