Maqsood Afaq
arsh-e-ḳhuda ḳhamosh hai tahtus-sara men chup
shor itna hai ki phail ga.i hai faza men chup
us ne bhi apne honTon ko paband kar liya
main ne bhi Daal rakhi hai dast-e-dua men chup
ilzam ab to tiir ki manind a.enge
tum aa.e bhi to yuun ki thi avaz-e-pa men chup
suraj ta.alluqat ka Dhalne pe aa gaya
mere junun men shor hai teri vafa men chup
pindar-e-sard-mehri-e-duniya ki ḳhair ho
dil ne agarche kar liya shamil dua men chup
koi vajud hi nahin lafz-e-sukun ka
apni baqa men chup hai na apni fana men chup
‘afaq’ duniya kya hai qayamat ke ba.ad bhi
zinda rahegi hulla-e-ahl-e-rida men chup
Leave a Reply