ehsās-e-zimmedārī bedār ho rahā hai
har shaḳhs apne qad kā mīnār ho rahā hai
āvāz-e-haq kahīñ ab rū-posh ho na jaa.e
harf-e-ġhalat barhana talvār ho rahā hai
kis naqsh kī jilā hai anfās-e-kahkashāñ meñ
vo kaun sāya-sāya dīvār ho rahā hai
minnat-gah-e-siyāhī ailān-e-ḳhair-ḳhvāhī
kam-zarf valvaloñ kā iz.hār ho rahā hai
hairat-zada hai ‘rāhī’ dariyā se ehtijājan
māsūm qatra-qatra ġhaddār ho rahā hai