Rasheed Lakhnavi
aap dil ja kar jo zaḳhmi ho to mizhgan kya kare
koi rakh de paanv ḳhud ḳhar-e-mughilan kya kare
rat-din hai san.at-e-haq kis tarah badlen sanam
ru-e-zeba kya kare zulf-e-pareshan kya kare
ruuh ghabra ke chali dekha jo ham ko muztarib
mezban ho jab pareshan rah ke mehman kya kare
dam nahin tan se nikalta kaT chuka bilkul gala
saḳht-jani ko hamari tegh-e-janan kya kare
tira-baḳhti se hai shikva muflisi se hai gila
raushni mumkin nahin sham-e-ghariban kya kare
zaḳhm-e-dil gahra bahut hai kis tarah Tanka lage
yaan rafu ki ja nahin tar-e-gareban kya kare
apni vahshat se hai shikva dusre se kya gila
ham se jab baiTha na jaa.e ku-e-janan kya kare
Leave a Reply