naqsh ankhon men utara jaega
phir safar men din guzara jaega
pahle dakhil hoga shab ke shahr men
phir savere ko pukara jaega
jab umiden khatm sab ho jaengi
vaqt phir kaise guzara jaega
haar kirnon ka bana kar jhiil ke
aaine men din sanvara jaega
dekh le gar ik nazar suraj ise
kohra ye be-maut maara jaega
thaam kar rakh tinka varna ek din
haath se ye bhi sahara jaega
jab bhatak jaega sahra men bahut
tab samundar ko pukara jaega
bebasi men duubi nazron se falak
ab qafas se bas nihara jaega