bul-havas kam-fahm hai vo aadmi nadan hai
jo ye samjha ishq kuchh mushkil nahin asan hai
kab main kahta huun ki meri jaan meri jaan hai
aap ki hai banda-parvar aap par qurban hai
be-ḳhudi ke ba.ad kya guzri nahin kuchh bhi ḳhabar
jalva-gah-e-naz tak pahuncha bas itna dhyan hai
kis ke jalve se hai be-ḳhud anjuman ki anjuman
har bashar tasvir hai har aa.ina hairan hai
mus.haf-e-ruḳhsar-e-janan par numud-e-ḳhat nahin
dekhne vaalo ye hai tafsir vo qur.an hai
us jagah pahuncha jahan qudsi bhi ja sakte nahin
dar-haqiqat aadmi ki shaan bhi kya shaan hai
us ke bande bandagi karte hain lekin ai buto
tum ḳhuda.i kar rahe ho ye ḳhuda ki shaan hai
kya chhupoge tum vahan vo kuchh tumhara ghar nahin
hashr ka maidan aḳhir hashr ka maidan hai
aarzu miTne ki thi rah-e-talab men miT chuke
aur ab ai hazrat-e-dil kahiye kuchh arman hai
aadmi to sab hi kahlate hain lekin ḳhalq men
us ka rutba aur hai jo aadmi insan hai
‘sabir’-e-asi ke isyan kyuun na baḳhshega ḳhuda
vo baḌa ghaffar hai sattar hai rahman hai
Leave a Reply