Meer Hasan
is dar se main ne zulf ki us ki na baat ki
jaati hai duur duur tak avaz raat ki
dekha jab aankh khol ke misl-e-habab tab
maalum kaenat hui kaenat ki
us bulbul-e-chaman ki hui aqibat ba-khair
saae men jis ne aan ke gul ke vafat ki
main huun sifat hi ke tahayyur men ham-nashin
kya baat mujh se puchhe hai tu us ki zaat ki
dil apna us ko dijiye ya ji ko khoiye
is ke siva tarah nahin koi najat ki
bola agar to qand-e-mukarrar hue vo lab
aur chup raha to ye bhi hai surat nabat ki
vaqif ho kyuun na shola-e-atish se dil ke vo
rahti hai baghban ko khabar phuul paat ki
shah chaal ho raha huun sanam tere ishq men
tu ne dikha ke rukh miri baazi hi maat ki
zulf-e-araq-fishan tiri jan-bakhsh kyuun na ho
tarkib us ne paai hai ab-e-hayat ki
us sar se ghair sar nahin vaqif koi gharaz
lazzat bayan men aati nahin teri laat ki
chuun zindagi-o-marg hain aapas men zid ‘hasan’
chashm-o-lab us ki zid hai hayat o mamat ki
Leave a Reply