Wali Alam Shaheen
zindagi hai muḳhtasar ahista chal
kaT hi ja.ega safar ahista chal
ek andhi dauḌ hai kis ko ḳhabar
kaun hai kis raah par ahista chal
dida-e-hairan ko ik manzar bahut
yuun hi nazzara na kar ahista chal
tez-gami jis shikam ki aag hai
us se bachna hai hunar ahista chal
jo tag-o-dau se tiri hasil hua
rakh kuchh us ki bhi ḳhabar ahista chal
roz o shab yuun vaqt ka daman na khench
do ghaḌi aram kar ahista chal
Leave a Reply