na arman ban ke aate hain na hasrat ban ke aate hain
shab-e-va.ada vo dil men dard-e-furqat ban ke aate hain
pareshan zulf munh utra hua mahjub si ankhen
vo bazm-e-ghair se ashiq ki surat ban ke aate hain
bane hain shaiḳh-sahib naql-e-majlis bazm-e-rindan men
jahan tashrif le jaate hain hazrat ban ke aate hain
na rakhna ham se kuchh matlab ye pahli shart hai un ki
vo jis ke paas aate hain amanat ban ke aate hain
sitam ki ḳhvahishen ‘beḳhud’ ghazab ki arzuen hain
javani ke ye din shayad musibat ban ke aate hain
Leave a Reply