dil bujhne laga atish-e-rukhsar ke hote
tanha nazar aate hain gham-e-yar ke hote
kyuun badle hue hain nigah-e-naz ke andaz
apno pe bhi uth jaati hai aghyar ke hote
viran hai nazar meri tire rukh ke muqabil
avara hain gham kucha-e-dildar ke hote
ik ye bhi ada-e-dil-e-ashufta-saran thi
baithe na kahin saya-e-divar ke hote
jiina hai to ji lenge bahar-taur divane
kis baat ka gham hai rasan-o-dar ke hote
Leave a Reply