amir-e-shahr ke angan men jab ujale hue
na jaane kitne gharon ke charagh kaale hue
isi zamin ke ḳhuda qabr-gah men apni
hain apni jism ki miTTi pe ḳhaak Daale hue
tumhari fikr ki kotah-qad haveli men
bujhe charagh to phir makḌiyon ke jaale hue
muḳhalifin ka ab shaghl ho gaya hai yahi
uchhalte hain ye jumle mire uchhale hue
ajiib baat hai ḳhud meri astin ke saanp
mujhi ko ghurte rahte hain sar nikale hue
hamare shahr men lafzon ki khetiyan hain bahut
qadim log hain saare lughat khangale hue
ye ahl-e-fan men bhi kiiḌe nikal dete hain
hasad ka tauq jo hain gardanon men Daale hue
Leave a Reply