dariya-e-nur-o-rang hai nik.hat hai zindagi
paighambar-e-ḳhulus-o-mohabbat hai zindagi
chaho to har qadam pe tumhen manzilen milen
socho to hausla hai shuja.at hai zindagi
ye imtiyaz-o-farq ye nafrat hiqaraten
aur maz.hab-e-vafa ki shari.at hai zindagi
meri nazar nahin nigah-e-shaiḳh-o-barahman
pasti nahin hai arsh ki rif.at hai zindagi
phir sham-e-hijr aa.egi sail-e-alam liye
phir ro ke ham kahenge ki furqat hai zindagi
galiyon ki ḳhaak chhani to moti mile hain
ye kah ke ham na so.e ki rahat hai zindagi
‘raje’ jo kuchh bhi faisla ahl-e-ḳhirad karen
mere liye to sirf mohabbat hai zindagi
Leave a Reply