zindagi motiyon ki Dhalakti laḌi zindagi rang-e-gul ka bayan dosto
gaah roti hui gaah hansti hui meri ankhen hain afsana-ḳhvan dosto
hai usi ke jamal-e-nazar ka asar zindagi zindagi hai safar hai safar
saya-e-shaḳh-e-gul shaḳh-e-gul ban gaya ban gaya abr abr-e-ravan dosto
ik mahakti bahakti hui raat hai laḌkhaḌati nigahon ki saughat hai
pankhuḌi ki zaban phuul ki dastan us ke honTon ki parchha.iyan dosto
kaise tai hogi ye manzil-e-sham-e-gham kis tarah se ho dil ki kahani raqam
ik hatheli men dil ik hatheli men jaan ab kahan ka ye sud-o-ziyan dosto
dosto ek do jaam ki baat hai dosto ek do gaam ki baat hai
haan usi ke dar-o-bam ki baat hai baḌh na jaa.en kahin duriyan dosto
sun raha huun havadis ki avaz ko pa raha huun zamane ke har raaz ko
dosto uTh raha hai dilon se dhuan aankh lene lagi hichkiyan dosto
Leave a Reply