Yaad Ke Sahra Mein Kuchh to Zindagi Aae Nazar

yaad ke sahrā meñ kuchh to zindagī aa.e nazar

sochtā huuñ ab banā luuñ ret se hī koī ghar

kis qadar yādeñ ubhar aa.ī haiñ tere naam se

ek patthar pheñkne se paḌ ga.e kitne bhañvar

vaqt ke andhe kuñ.eñ meñ pal rahī hai zindagī

ai mire husn-e-taḳhyyul baam se nīche utar

tū asīr-e-ābrū-e-sheva-e-pindār-e-husn

maiñ giraftār-e-nigāh-e-zindagī-e-muḳhtasar

zabt ke qarye meñ ‘amjad’ dekhiye kaise kaTe

soch kī suunī saḌak par yaad kā lambā safar

Leave a Comment