Amjad Islam Amjad
yaad ke sahra men kuchh to zindagi aa.e nazar
sochta huun ab bana luun ret se hi koi ghar
kis qadar yaden ubhar aa.i hain tere naam se
ek patthar phenkne se paḌ ga.e kitne bhanvar
vaqt ke andhe kun.en men pal rahi hai zindagi
ai mire husn-e-taḳhyyul baam se niche utar
tu asir-e-abru-e-sheva-e-pindar-e-husn
main giraftar-e-nigah-e-zindagi-e-muḳhtasar
zabt ke qarye men ‘amjad’ dekhiye kaise kaTe
soch ki suuni saḌak par yaad ka lamba safar
Leave a Reply