Najeeb Ahmad
tira rang-e-basirat hu-ba-hu mujh sa nikal aaya
tujhe main kya samajhta tha magar tu kya nikal aaya
zara sa kaam paḌte hi mizaj ik ḳhak-zade ka
qad-o-qamat main gardun se bhi kuchh uncha nikal aaya
zar-e-ḳhushbu khanakta rah gaya dast-e-gul-e-tar men
dil-e-sada ḳharidar-e-dil-e-sada nikal aaya
ajab ik mo.ajaza is daur men dekha ki pahlu se
yad-e-baiza nikalta tha magar kaasa nikal aaya
kahani jab bhi dohra.i pas-e-har-abla-pa.i
vahi mahmil vahi majnun vahi sahra nikal aaya
‘najib’ ik vahm tha do chaar din ka saath hai lekin
tire gham se to saari umr ka rishta nikal aaya
Leave a Reply