qismat apni aisi kachchi nikli hai
har mahfil se bas tanha.i nikli hai
ḳhat us ke jab aaj jalane baiTha to
machis ki tiili bhi siili nikli hai
shor-sharaba rahta tha jis angan men
aaj vahan se bas ḳhamoshi nikli hai
bhuka bachcha dekha to in ankhon se
aansu ki phir ek nadi si nikli hai
apni surat ki parten jab kholin to
apni surat us ke jaisi nikli hai
main ne bhi dekha hai teri rahmat ko
tufanon se bach ke kashti nikli hai
dil TuuTa to ‘mit’ samajh men ye aaya
ishq vafa sab ek paheli nikli hai
Leave a Reply