raushni laTki hui talvar si
husn-afza zindagi ḳhun-ḳhvar si
ḳhushbuon ki narm ham-aghoshiyan
darmiyan ik ahani divar si
samne sad-rang nusḳhe, mashvare
zindagi sadiyon se kuchh bimar si
kaali ankhon men shahabi karvaTen
koi ḳhvahish raat men bedar si
mahv se hote hue aḳhbari shor
yaad ki aahaT achanak taar si
unghti si har taraf bedariyan
aankh us ki har tarah hushyar si
dil vahi barbad aur sadiyon ki gard
vaqt ki har fat.h bhi be-kar si
Leave a Reply