Sahir Hoshiyarpuri
gham-e-dil ruḳh se ayaan ho ye zaruri to nahin
ishq rusva-e-jahan ho ye zaruri to nahin
lab pe har-vaqt fughan ho ye zaruri to nahin
ham-nava dil ki zaban ho ye zaruri to nahin
jan-e-tanha pe guzar jaa.en hazaron sadme
aankh se ashk ravan ho ye zaruri to nahin
mil hi ja.egi kahin DhunDhne vaale ko bahar
har gulistan men ḳhizan ho ye zaruri to nahin
ham jise apni zaban se bhi na kahne paa.en
vo mohabbat ka bayan ho ye zaruri to nahin
un ki ankhon men chhalak aa.e hain aansu jis se
vo mire dil ka dhuan ho ye zaruri to nahin
zabt bhi hota hai andaz-e-junun men shamil
aarzu shola-ba-jan ho ye zaruri to nahin
arzuon ki bhi ik bhiiḌ hai shahr-e-dil men
hasraton ka hi nishan ho ye zaruri to nahin
soch kar vadi-e-ulfat men qadam rakh ‘sahir’
sirf dil hi ka ziyan ho ye zaruri to nahin
Leave a Reply