sub.h-dam kaun ye nindon se jaga deta hai
raat ko lori sunata hai sula deta hai
baat badle ki yahan tak use le aa.i hai
vo miri yaad ko suuli pe chaḌha deta hai
us ki niyyat men hai kya vo to ḳhuda hi jaane
mera dushman mujhe jiine ki dua deta hai
jada-e-ishq men darkar hai iḳhlas-e-amal
zarra-zarra jahan paigham-e-vafa deta hai
abr ka TukḌa hi sar par mire vo bhijvata
reg-zaron men jo sabze ko uga deta hai
mashghala us ka abhi tak hai vahi sunte hain
ret pe likh ke mira naam miTa deta hai
ham samajhte hain kami-beshi tavajjoh ki tiri
kaun hai dard baḌhata hai ghaTa deta hai
hasb-e-taufiq amal bhi hai zaruri ‘najmi’
kamyabi to ba-har-hal ḳhuda deta hai
Leave a Reply