gahri niili shaam ka manzar likhna hai
teri hi zulfon ka daftar likhna hai
ka.i dinon se baat nahin ki apnon se
aaj zaruri ḳhat apne ghar likhna hai
shiddat par hai hare-bhare patton ki pyaas
sahra sahra ḳhuun samundar likhna hai
patthar par ham naam kisi ka likkhenge
a.ine par aazar aazar likhna hai
chehra raushan khule hue sahra ki dhuup
gahri ankhen gahra sagar likhna hai
is se aage kuchh likhne se qasir huun
is ke aage tujh ko baḌh kar likhna hai
Leave a Reply