kya la-makan se aage zamin asman hain aur
kya kuchh makin bhi aur hain kya kuchh makan hain aur
sahil nahin mila magar itna pata chala
is bahr men jazire ka.i be-nishan hain aur
jhukti hain jin ke aage muḳhalif hava.en bhi
vo kashtiyan hi aur hain vo badban hain aur
sahra jo mauj-e-reg hua kuchh bhi gham nahin
dariya men bhi tumhare qadam ke nishan hain aur
un se mukalima tha muqaddar tamam-umr
apni zaban aur vo ahl-e-zaban hain aur
betab kamyab hue ham hazar baar
har baar ye suna ki abhi imtihan hain aur
Leave a Reply