Samajh Rahe the Ki Ab Shab Gai Sahar Aai

Poet

samajh rahe the ki ab shab ga.i sahar aa.i

tire dayar men vo raushni nazar aa.i

nishat-o-gham ka ta.alluq bhi kya ta.alluq hai

abhi hanse bhi na the ham ki aankh bhar aa.i

mana rahe hain manana tha jin ko jashn-e-bahar

mire nasib men taz.in-e-bam-o-dar aa.i

ye aur baat ki sab kuchh kaha ho sach tu ne

mujhe hansi to tiri baat baat par aa.i

kamal hai ye tasavvur ki mashq-e-paiham ka

tire hijab ki tasvir bhi utar aa.i

vasuq-e-azm pe hain kamraniyan mauquf

ḳhayal-e-rahguzar aate hi rahguzar aa.i

bala se ahd-e-baharan ne dil ko zaḳhm diye

‘nasir’ surat-e-gulzar to nikhar aa.i