Din Raat Tumhaari Yaadon Se Hum zaKHm Sanwara Karte Hain

Hidayatullah Khan Shamsi

din raat tumhari yadon se ham zaḳhm sanvara karte hain

pardes men jaise-taise hi ai dost guzara karte hain

ḳhuddar tabi.at hai apni faqon pe basar kar lete hain

ehsan kisi ka duniya men hargiz na gavara karte hain

ab laakh ḳhizaon ka mausam bhi kuchh na gulon ka kar paa.e

ham ḳhun-e-jigar se gulshan ka har rang nikhara karte hain

atraf hamare logon ki ik bhiiḌ thi jab tak paisa tha

ye jeb hui ab ḳhali to sab log kinara karte hain

jab un ke muqabil hote hain vo baat nahin karte ham se

aur duur nazar se hote hi bas zikr hamara karte hain

kyuun zaḳhm dikha.en ham ‘shamsi’ ab kaun laga.ega marham

sab log to dil men hans hans kar ḳhanjar hi utara karte hain