Javed Jameel
vo chandni men kuchh aisa tha tar-ba-tar tanha
main dekhta raha manzar ye raat bhar tanha
hui hai jaise abhi tak guzar-basar tanha
guzar Dalenge baaqi ka bhi safar tanha
pukarta huun tira naam jaise sahra men
hamesha aati hai avaz lauT kar tanha
uqaab uḌta hai jis tarah asmanon men
bulandiyon men kiya karta huun safar tanha
hamesha rahta hai hamrah qafila us ke
musibat aati nahin hai kisi ke ghar tanha
vo muntazir hai koi us ke saa.e men aa.e
khaḌa hai duur rah-e-haq pe ik shajar tanha
sharik qafila hota to jashn ho jaata
mile the ḳhizr safar tha mira magar tanha
chali ga.i hai tire saath zindagi ‘javed’
main ho gaya huun tire ba.ad kis qadar tanha
Leave a Reply