asir-e-panja-e-ahd-e-shabab kar ke mujhe
kahan gaya mira bachpan ḳharab kar ke mujhe
kisi ke dard-e-mohabbat ne umr-bhar ke liye
ḳhuda se maang liya intiḳhab kar ke mujhe
ye un ke husn ko hai surat-afrin se gila
ghazab men Daal diya la-javab kar ke mujhe
vo paas aane na paa.e ki aa.i maut ki niind
nasib so ga.e masruf-e-ḳhvab kar ke mujhe
mire gunah ziyada hain ya tiri rahmat
karim tu hi bata de hisab kar ke mujhe
main un ke parda-e-be-ja se mar gaya ‘muztar’
unhon ne maar hi Daala hijab kar ke mujhe
Leave a Reply