mausam ne gulabon ke angare hi baḳhshe hain
uThta hai dhuan dil se ham aag men jalte hain
yuun un ke dariche tak jaati hai nazar jaise
paani ke liye dahqan akash ko takte hain
is vaqt bichhaḌte ho kyon rah-e-vafa men tum
kuchh aur chalo sathi aage ka.i raste hain
ye raat hai savan ki jangal men akela huun
bijli bhi chamakti hai badal bhi baraste hain
‘asrar’ na kar shikva logon se zamane ka
afat men tap kar hi insan nikharte hain
Leave a Reply