Zakir Khan Zakir
kabhi azabon men bas rahi hai kabhi ye ḳhvabon men kaT rahi hai
ye muḳhtasar si hai zindagi jo hazar ḳhanon men baT rahi hai
kahin pe ḳhushiyon ki barishen hain kahin pe naghmat-e-aish-o-masti
magar gharibon ke gulshanon se ḳhizan hi baḌh kar lipaT rahi hai
kahan hai jazbe mohabbaton ke kahan hai rasm-e-vafa-parasti
mili thi tahzib ki badaulat vahi mohabbat to ghaT rahi hai
lage hain baḌhne nazar nazar men fahashiyon ke tamam sapne
saron pe saya-fagan thi kal tak rida haya ki simaT rahi hai
jo sin-rasida shajar the saare jaḌon se apni ukhaḌ rahe hain
zamin ke rishton ki chhanv yaaro saron se apne bhi chhaT rahi hai
kise suna.enge ab vo ‘zakir’ ki chahaton men kashish nahin hai
nazar se ojhal main ho raha huun nigah se vo bhi to haT rahi hai
Leave a Reply