lab-e-khamosh se us ne khush-amdid kaha
usi ko logon ne phir guft aur shunid kaha
bahar-e-lala-o-gul se khizan ki aahat tak
har ek vaqia mausam ne chashm-did kaha
junun men pahle to iqrar kar liya us ne
junun ki baat ko phir aql se baiid kaha
hasin tabsira mausam pe jab tamam hua
to us ne kaan men chupke se kuchh mazid kaha
tira khayal kiya ham ne vasl se taabir
tiri gali se guzarne ko bazdid kaha
na ham se puchha gaya zabt ka sabab koi
na ham ne dard ko apne kabhi shadid kaha
miri sarisht-e-‘sukhan’ men hain kuchh nae uslub
nai ghazal ne mujhe bhi khush-amdid kaha
Leave a Reply