Poet
nafs-e-sag-e-palid ko gar apne mariye
manind-e-sher dasht-e-jahan men dakariye
us gul ko josh-e-gul men ye kah kar ubhariye
gulshan men andalib ko chal kar pukariye
phir murgh-e-dil ko phansiye phir jaal mariye
phir ho sake to aap se gesu sanvariye
piiri men kaif-e-ishq se tauba to kijiye
manzil rahi hai thodi si himmat na hariye
girdab-e-bahr-e-ishq ke chakkar hain raat din
kaun ashna-e-hal hai kis ko pukariye
dil de ke jaur-o-zulm ka shikva na kijiye
do din ki zindagi kisi dhab se guzariye
ahl-e-havas ki dahr men mitti kharab hai
galiyon men khaak chhan rahi hain niyariye
manind-e-zulf ghair ko kyuun sar chadhaiye
ankhon se shakl-e-ashk ke is ko utariye
paida karen asar jo dur-e-ashk naseho
un motiyon pe hans ko sau baar variye
juz mere daal aap ki galti nahin kahin
yuun munh se jitni chahiye shekhi baghariye
naala jo zer-e-tegh kiya main ne jis ghadi
bole ki ek dam ke liye dam na mariye
tauba sharab-e-ishq se kis tarah kijiye
kyunkar ye jin chadha hua sar se utariye
kya kya na dost apne miyan-e-adam gae
kis ko talash kijiye kis ko pukariye
us but ke bahr-e-husn men dil ko duboiye
is kashti-e-hayat ko yuun paar utariye
manzur ho jo rahat-e-kaunain ‘muntahi’
hathon ko khich lijiye paanv pasariye
Leave a Reply